Көпшілік шаралар

Ағымдағы жылдың 14-наурыз күні Батыс Қазақстан облыстық тарихи-өлкетану музейінің ұйымдастыруымен бастау алған «Музейстар-2019» жобасының алғашқы қатысушысы М.Өтемісов атындағы БҚМУ-нің «Білімді жастар-ел болашағы» атты көрмесінің жалғасы ретінде 9 сәуір күні сағат 15:00 –де  «Жастар шығармашылығына» арналған шарасы оздырылды. Концерттік бағдарлама барысында қала тарихына және университеттің тарихы мен жетістіктерін баяндайтын бейнеролик көрсетіліп, сонымен қатар халықаралық және облыстық деңгейдегі өнер жолында жүлделі орын алып жүрген жас дарындардың орындаулары тамашаланды. Оның ішінде, «Абай оқулары», «Оралхан оқулары», «Жұмекен Нәжімеденов оқуларының» жеңімпаздары Ғабитов Ғ., Кінәма Е., Қуанышбайұлы Д. көркемсөз оқыса, Қапсиқов Қадыржан «Бір ел болса» әнін тарту етіп, «Арна» би ансамблі «Хорезм» биін билеп, «Сәндік қолданбалы өнер» мамандығы студенттері сән топтамаларын ұсынып, көрермен назарына бөленді. Шараға М.Өтемісов атындағы БҚМУ-нің ардагер ұстаздары, профессорлары, студенттері, Жәңгір хан атындағы БҚАТУ оқытушылары , Құрманғазы атындағы саз колледжінің студенттері және облыстық музей және бөлім қызметкерлері, БАҚ өкілдері қатысты.